Jón Gnarr blekktur af borgaryfirvöldum

Jón Gnarr mun hafa verið valinn úr hópi umsækjanda til að semja leikrit fyrir Borgarleikhúsið. Ég trúi ekki öðru en Jón Gnarr dragi umsókn sína strax til baka. Bæði Reykvíkingar og Íslendingar allir þarfnast hans sem stjórnmálamanns í 100% starfi enda erfiðir tímar á Íslandi hér eftir sem hingað til og Jón Gnarr og Besti flokkurinn eru þeir einu sem bjóða upp á raunhæfar lausnir á vandanum.

En auðvitað var Jón Gnarr "valinn" til að sinna ritstörfum. Hann er ógn við ríkjandi valdhafa í borginni sem vilja dreifa athygli hans í annað en stjórnmálin. Ég sé fyrir mér að Hanna Birna hafi hringt í leikhússtjóra síðla kvölds í reykmettuðu bakherbergi og óskað eftir "ákveðinni niðurstöðu" þegar leikskáld Borgarleikhússins var valið. Leikhússtjóri hefur svarað borgarstjóranum: "Ég skil, málið er afgreitt".

Þegar kraftar Jóns fara í að búa til leikrit fyrir Borgarleikhúsið er Besti flokkurinn vanræktur á meðan og borgarfulltrúar og aðrir valdhafar varpa öndinni léttar. Jón Gnarr! Þjóðin þarfnast þín. Ég vona að þú sjáir í gegnum þessar blekkingar yfirvalda sem eitra hug þinn og slæva dómgreind. Einbeittu þér að bara Besta flokknum!

Jón Gnarr nýtt leikskáld Borgarleikhússins

Ísbirnir eru velkomnir í Húnaþing

Nú hafa þrír ísbirnir gert sig heimakomna hér á landi með tiltölulega stuttu millibili. Í engu tilfellanna létu þessi mikilfenglegu og fallegu spendýr sjá sig í sínum eðlilegum heimkynnum, Húnavatnssýslu, hvar sýslan er nefnd eftir afkvæmum þeirra, húna. Þetta eru mikil vonbrigði og bera líklega vott um að vesalings dýrin hljóta þó að minnsta kosti hafa verið á leiðinni í Húnaþing þegar þau voru illu heilli aflífuð. Það er huggun harmi gegn að birnan sem skotin var við Hraun á Skaga hefur fengið lögheimili í Hafíssetrinu á Blönduósi. Þar býr hún við gott atlæti, aðdáun og umhyggju.

Ég vil beina þeim vinsamlegu tilmælum til allra ísbjarna sem hafa hug á að koma til Íslands í framtíðinnni að mæta beint í Húnavatnssýsluna án þess að millilenda í öðrum misgóðum sýslum enda er hagsmunum þeirra best borgið í Húnavatnssýslu. Menn skjóta ekki vini sína í Húnaþingi.

Fólk hafi varann á sér

Næst söluhæsta bíómynd frá upphafi

Ja, detti nú allar dauðar! Avatar er komin í tæplega 1.400 milljón dollara sölu. Hún á þó enn talsvert í að ná Titanic (1.835 milljón dollara og því söluhæsta kvikmynd sögunnar). Það að vera kominn upp fyrir Star Wats og Dark Knight, ég tala ekki um LOTR í sölu, segir sitt um gæði myndarinnar og e.t.v. áhrifamátt.

Myndin er tær snilld að mínu mati og fær **** af **** mögulegum. Ég kannast samt ekki við nein sérstök þunglyndiseinkenni eftir að hafa séð myndina í þrívídd ekki nema mér fannst gleraugun fara mér afspyrnu illa og heppinn að mamma sá mig ekki með þennan óskapnað í andlitinu.

Þunglyndir í kjölfar Avatars

Íslendingur í misheppnaðri útrás

Ónefndur íslenskur karlmaður, sem "sagður er" 53 ára gamall er kominn í heimsfréttirnar.

Hann taldi sig þriggja kvenna maka taílenskra fljóða en var svæfður og rændur af þeim áður en hann gat sannað bólfimina. Stundum getur íslenska þjóðarstoltið og sjálfstraustið borið menn ofurliði. Þessi "víkingur" hefði kannski átt að lesa Brennu-Njáls sögu eða Gísla sögu Súrssonar áður en hann réðst til atlögu við "veikara" kynið. Þetta er eitt besta dæmið um misheppnaða útrás Íslendings frá hruni bankanna.

JÁ, enn á ný bíður Ísland ósigur í efnahagslegu tilliti og þjóðin er fjögurhunduðþúsundkrónum fátækari fyrir vikið. Hversu langt getur vor íslenska niðurlæging náð? Að tapa 0-3 fyrir Taílandi. En e.t.v. er þetta samt ekkert flókið. Kannski er maðurinn einfaldlega ekki nógu TÆLANDI?

Kvensamur Íslendingur rændur í Taílandi

Nýr forystumaður Framsóknar í Kópavogi

Það yrði mikill fengur fyrir Kópavog og Kópavogsbúa ef Gísli Tryggvason verður kosinn til að sitja í bæjarstjórn og taka að sér trúnaðarstörf fyrir Kópavog. Gísli er heiðarlegur og harðduglegur eins og hann hefur sýnt sem talsmaður neytenda. Þá hefur hann góða menntun, reynslu og þekkingu á hinum ýmsu samfélagsmálum sem styrkir hann sem stjórnmálamann.

Það er talsverð eftirspurn eftir nýjum og öflugum stjórnmálamönnum um þessar mundir. Gísli Tryggvason svarar því kalli og ég skora á framsóknarmenn í Kópavogi að fylkja sér á bak við hann og styðja til að leiða flokkinn í komandi sveitarstjórnarkosningum.

Vill leiða framsóknarmenn í Kópavogi

Tapsár lávarður

Lord Hattersley er náttúrulega ennþá í fýlu enda var farið illa með hann í Þorskastríðinu.

Lávarðurinn segir gen okkar anga af þrjósku og allt að því heimsku vegna þess að við viljum ekki borga 3,6 milljarða punda til Breta. Hann sakar okkur (þ.e. þegar við vorum "Norðmenn" á landnámsöld) um að vera með hendur ataðar blóði og að hafa rænt og ruplað og stolið þrælum á Írlandi og í Skotlandi. Skemmtileg söguskoðun frá hrokafullum breskum yfirstéttarmanni sem sjálfsagt hefur átt afa eða langafa sem hefur haft afrískan eða indverksan þræl á sínum tíma.

Hann fer hins vegar villur vegar í málflutningnum því við viljum borga okkar skuldbindingar en á sanngjarnan og eðlilegan hátt en ekki eftir einhliða pöntun frá Gordon Brown og Darling Alistair.

Hinir þrjósku Íslendingar

Fréttir (tímasettar) í pólitískum tilgangi?

Það er mjög, mjög, slæmt ef menn missa eigur sínar og harmleikur ekki síst ef það er vegna þess að viðkomandi hefur gengist í ábyrgð fyrir aðra. Það er þó enn verra þegar menn bera harmleiki sína, þ.m.t. fjölskylduharmleiki og vináttuslit fram í s.k. ,,opnum" bréfum dagblaðanna. Mér finnst það ólíkt Morgunblaðinu að leyfa birtingu á grein sem þessari og blaðinu til vansa. Þessi frétt er í algjörum ,,DV-stíl".

Ég er afar ósammála Birni Vali Gíslasyni í pólitík. Þessi grein birtist hins vegar á sama tíma og Björn Valur er mjög áberandi í umræðunni um ICESAVE og forsetann. Tilviljun?

Ég tek fram að ég er algerlega ósammála Birni Val í hans pólitík um ICESAVE o.fl. en mér hugnast lítt þessi fréttamennska og framsetning þessarar fréttar.

Saknar vináttu sem glataðist

Er ferill þessa manns á enda?

Það er þörf áminning fyrir (fyrrverandi) hasarmyndahetju númer eitt að slaka á í hasarnum þegar hann er farinn að hálsbrotna í léttum átökum við sér yngri menn. Stallone er enda að nálgast eftirlaunaaldurinn og fjölbragðaglíma ekki heppilegasta íþróttin fyrir eftirlaunaþega.

Á Stallone einhvern möguleika sem hasarmyndhetja kominn vel á sjötugsaldurinn? Ég sé Stallone ekki fyrir mér í þriggja vasaklúta Jane Austin búningamynd eða dramatíker í anda Lars Von Trier. Rocky VII hljómar ekki spennandi heldur. Líklegast er því kvikmyndaferillinn sé allur og því verði Stallone að fara að vinna aftur í sláturhúsinu þar sem hann vann þegar Rocky 1 var mynduð. Hann getur vel orðið sláturhússtjóri.

En ég óska honum góðs bata.

Vonandi þarf hann ekki að fara í frekari lýtaaðgerðir...

Sylvester Stallone hálsbrotnaði við tökur

Fyrirmyndarbærinn Blönduós

Einungis einn maður var vitlaus með víni á Blönduósi um jólin. Þetta er besti árangur í áfengisvörnum sem um getur á síðari tímum hér á landi. Að sögn kunnugra er hér líklega um Norðurlandamet að ræða þegar um er að ræða sveitarfélög sem telja yfir 500 manns.

Einn með drykkjulæti á Blönduósi

Óheppilegt nafn fyrir íþróttamann

Ég hélt fyrst að sú frétt að bakvörðurinn Tom Cruise fengi tækifæri með hinu "sæmilega" Arsenal liði væri lélegur brandari. Sú er ekki raunin. Hann er aðeins 18 ára þessu ólánsami piltur sem heitir í höfuðið á nafna sínum í Hollywood. Þeir munu ekki vera skyldir. Annað hvort eru foreldrarnir með Tom Cruse (leikarann) á heilanum eða þau voru vandræðalega illa upplýst um kvikmyndiðnaðinn í Hollywood á níunda áratugnum. Tom Cruise var orðinn nokkuð þekktur leikari fyrir 26 árum og mjög þekktur eftir myndina Top Gun (1986) sem er raunhæf lýsing á starfi orustuflugmanna í bandaríska flughernum.

Hvernig haldið þið annars að það myndi ganga fyrir ungan og efnilega leikara, Muhammed Ali að nafni, að koma sér á framfæri í kvikmyndaiðnaðinum í Hollywood?

Þetta nafn piltsins mun klárlega koma í veg fyrir að hann eigi einhvern feril sem atvinnumaður því hver getur tekið Tom Cruise alvarlega á knattspyrnuvelli? Ekki nema hann sé góður að fiska aukaspyrnur og taka dýfur eins og góður leikari kannski. Hans eiga von er því að skipta um nafn (má ég leggja til Thomas Kraus).

Tom Cruise er í byrjunarliðinu