B&L er merkið mitt, merki bílamanna...

Það er alltaf gaman að heyra í Bubba tjá sig um hlutina. Ég skil ekki þá sem láta það fara í taugarnar á sér. Bubbi var snillingur. Hann er snillingur og verður það alltaf fyrir utan að vera eilífðartöffari! Ég elska þig Bubbi!

Bubbi er smækkuð mynd af Íslendingum. Hann fór offari í góðærinu og var alveg ferlega 2007 eitthvað. Hann tapaði peningum á hruninu en er aftur að finna sinn rétta innri baráttumann.

Bubbi: Út með B&L merkið og inn með Stálið & hnífinn!

Bubbi er sleginn

Gangi þeim vel

Vonandi gengur vel á vettvangi frændsemi Norðurlandaþjóða að búa til aðgerðaáætlun gegn kreppunni. Það gengur nefnilega ekki svo vel hér á landi þar sem stefnu- og aðgerðarleysi stjórnvalda er allsráðandi. Við getum kennt frændum okkar hvernig ekki á að bregðast við kreppunni. Við getum kennt frændum okkar hvernig stjórnvöld eru að bregðast heimilum þessa lands.

Ég er samt viss um að Össur mun njóta sín vel á fundinum við að ræða um ESB og brosa fallega í myndavélarnar með forsetum og ráðherrum.

Ræða sameiginlegar aðgerðir í fjármálakreppunni

Hlustið og lærið

Sigmundur reynir og reynir að tala til þjóðarinnar og annarra stjórnmálaflokka. Enginn annar en hann virðist hafa dug og þor til að segja óþægilegu hlutina. Staðan er geysilega erfið og engar bráðabrigðalausnir duga. Framsókn vill lausnir sem duga. Áfram með þig Sigmundur!

Fjölskyldan með tilsjónarmann

Það er gott að búa í Kópavogi...

... nema ef maður heitir Gamla Kópavogshælið. Þarna stendur það eitt, grátt og guggið, börnum og hröfnum að leik. Gunnar á ekki pening til að klæða það í ný föt. Það fór of mikill peningur í steypuvæðingu og uppkaup á Gusts svæðinu. Núna er ekki til peningur - hann kláraðist í ofskipulagninu og græðgi. Það er kreppa núna og of dýrt að gera við.

Gamla Kópavogshælið vill bara athygli og hlýju frá Gunnari en fær hana ekki. Samt á að halda listahátíð í Kópavogi því ekki má gleyma menningunni segir Gunnar og skreppur til útlanda svona til að kynna sér málin.

En það má gleyma Kópavogsheimilinu gamla. Verður það nöturlegur minnisvarði græðginnar?

Gamla hælið grotnar niður

Líklega besti leikmaðurinn í heimi í dag

Flott frétt fyrir alla Púllara. Til hamingju bræður og systur og gott á ykkur hinir! Steven okkar Gerrard verður áfram hjá Liverpool. Hann er sá besti í heimi (já svona með Messi).

Gerrard framlengir hjá Liverpool

RÚV í ruglinu. Yes, no, yes, no!

Mörg undanfarin ár hef ég, eins og margir Íslendingar, haft af því ánægju og einnig nokkuð gagn, að hlusta á spurningakeppni fjölmiðlanna á RÚV. Það er farið að tilheyra páskahátíðinni. En svo dró ský fyrir sólu. Stjórnendur RÚV lýstu því yfir að af sparnaðarástæðum yrði keppnin lögð niður. Kom það m.a. fram í fjölmiðlum fyrir skömmu. Já af sparnaðarástæðum! Ef Páll nokkur Magnússon myndi lækka laun sín um 10% í 3-4 mánuði er líklega búið að borga upp allan kostnað við þáttagerð Ævars snillings Jósefssonar og líklega gott betur. Það gerir Páll ekki.

Fréttin um uppgjöf RÚV á spurningakeppninni og Ævari hafði ekki fyrr farið í loftið en BYLGJAN greip tækifærið fegins hendi og ætlar að halda keppnina með pompi og prakt um páskana með spyrlinum Loga Bergmann. Skiljanlega því þessi keppni er bæði vinsæl hjá íslenskum almúga og skemmtileg og ákvörðun RÚV framandlega heimskuleg. Með fullri virðingu fyrir Loga Bergmann þá er Ævar orðinn óaðskiljanlegur hluti þessarar keppni og Bylgjumenn hefðu betur splæst í að ráða hann til sín. Það gerðu þeir ekki. Stór tæknileg mistök!

VEGNA ÞESS að þegar Sigrún Stefánsdóttir fréttir svo að samkeppnisaðilinn BYLGJAN hafi tekið keppnina upp á sína arma þá kom annað hljóð í strokkinn. Nú á að halda keppnina í kringum hvítasunnu. Sem sagt ekki hafa hana um páskana en aðeins seinna. Útkoman er enginn sparnaður heldur aukin útgjöld hjá Dagskrárdeild RÚV við að segja eins og Vicky Pollard í Little Britain "yes, but not, but yes, but no, but...". En gangi þér vel Logi Bergmann og takk BYLGJA fyrir að taka við keflinu. Ég hlakka til að hlusta (á tvær fjölmiðlakeppnir á sama árinu).

Til hamingju með skynsamlega stefnumörkun í dagskrárgerð RÚV-arar!

Spurningakeppni fjölmiðla um hvítasunnu

Innan við milljón í bætur fyrir sálarmorð

Ég sá myndina um Breiðavíkurdrengina í gær. Nú birtast fréttir þess efnis að ekki gangi saman með Breiðavikursamtökunum og yfirvöldum um bótagreiðslur þeim eða afkomendur þeirra til handa. Ef þessar tölur eru réttar sem ríkið hyggst bjóða (virðist vera "take it - or leave it" dæmi) þá eru bæturnar innan við milljón á einstakling sem þarna dvaldi.

Þótt menn hafi dvalið þarna mislengi eru þetta smánarlegar bætur og til skammar fyrir yfirvöld. Gleymum því ekki að í mörgum tilfellum hefur lífi þessara manna verið rústað. Eyðilagt af heimili sem rekið var að ríkinu. Það er mjög brýnt að ná sátt við Breiðavíkursamtökin um málið því þetta mál er dökkur blettur á íslensku samfélagi. Við eigum að hjálpa þessum drengjum að ljúka málinu að þessu leytinu en málinu líkur kannski aldrei í sál og sinni þeirra sjálfra. Því miður.

Engin sátt í Breiðavíkurmáli

Munu þingmenn bjarga Íslandi úr kreppunni?

Ég held ekki, sbr. þessi frétt. Þingmenn syngja (ok bara einn þingmaður) og rífast um allt og ekkert. Þeir eyða tímanum í afgreiðslu lagafrumvarpa sem allt eins mega bíða næsta þings. Stjórnarþingmenn einbeita sér að stjórnlagaþingi en ekki að heimilum landsins eða endurreisn atvinnulífsins. Greiðslujöfnunarfrumvarpið breytir þar litlu.

Á meðan bíður hin þolinmóða íslenska þjóð ennþá eftir úrræðum. Þau bara koma ekki.

„Hættið þessu helvítis væli"

Hvar er þessi endi......................Gylfi?

Viðskiptaráðherra segist sjá endann á hrunsferli Íslands sem hófst í október 2008. Hann segir stjórnvöld hafa nokkuð skýra mynd af því sem þarf að gera til að hér verði heilbrigt fjármálakerfi. Hvað um heilbrigt atvinnu- og heimilislíf?

Ég dreg í efa að ráðherrann tali hér af hreinskilni. Þau fyrirtæki sem hafa verið "tæknilega" gjaldþrota um margra mánaða skeið eru að týna tölunni, eitt af öðru. Gróin fyrirtæki sem hafa verið tengd byggingariðnaðinum með einum eða öðrum hætti, eru ýmist farin á hausinn eða eru á leiðinni þangað. Gott dæmi um það er Egill Árnason hf. Fasteignasölur hafa farið á hausinn og fasteignasalar lepja dauðann úr skel. Byggingariðnaðurinn er lamaður og byggingarvöruverslanir berjast í bökkum. Velta í verslun dregst eðlilega saman í kreppu. Laugavegurinn er ekki svipur hjá sjón. Og ég er ekki byrjaður að tala um smáfyrirtækin í landinu og heimilin þar sem úrræðið "Greiðsluaðlögun" mun ekki bjarga nema hluta af þeim verst stöddu.

Vonandi sér fyrir endann á hruninu Hr. Ráðherra en því miður er ekki margt sem bendir til þess.

Hitt er svo annað mál. Hvar eru foringjar þessa lands að blása bjartsýni, kjark og þor í landann? Ekki eru þeir í ríkisstjórninni eða stjórnarandstöðu, það eitt er víst!

Sér fyrir endann á hrunsferli

Ó, Reykjavík, borg hinna rauðu ljósa...

Mér er fyrirmunað að skilja hvað verkfræðingar í Umferðarljósadeild Framkvæmdasviðs Reykjavíkurborgar eru að gera i vinnunni. Hvort sem ekið er á löglegum eða ólöglegum hraða (ég myndi neita fyrir rétti að ég keyrði of hratt) lendir maður alltaf á rauðu ljósi. Ok kannski ekki alltaf en næstum því alltaf. Kannski er ég í ruglinu enda sveitamaður og ekki alinn upp við umferðarljós. Kannski er þetta allt misskilningur í mér? En kannski ekki?

Ég keyri daglega í vinnuna úr hinum fallega Vesturbæ til Kópavogs þar sem gott er að búa. Á leiðinni þangað keyri ég af Miklubraut og austur á Bústaðaveg. Við fyrstu ljósin þar stöðvast yfirleitt margir bílar og mun fleiri en keyra af Snorrabrautinni og áfram Bústaðarveg. Samt er það þannig við næstum umferðarljós í ca 200-300 m fjarlægð við Slökkvistöðina að þeir sem koma af Miklubraut lenda nánast alltaf á rauðu ljósi. Það er afar pirrandi. Tíu, tólf bílar bíða því í ca hálfa mínútu en einn eða tveir keyra yfir gatnamótin hinu megin frá. Skynsamlegt?

Á tímum kreppu og olíusparnaðar. Elsku verkfræðingar í Umferðarljósadeild Framkvæmdasviðs Reykjavíkurborgar. Getið þið lagað þetta þannig að þar sem mesta umferðin er - hún fái mest og best BRAUTARgengi hjá ykkur? Að Miklubraut, Sæbraut o.fl. stofnæðar séu með umferðarljós stillt til þæginda þannig að umferðin líði fallega áfram á grænu ljósi. Þeim pening er vel varið að láta mestu umferðina komast sem auðveldast á milli staða í stað þess að menga umhverfið við hver einustu umferðarljós.

Ég hata umferðarljós!